2023 වසරේ සිට රෝගීන් හයදෙනකුට පමණ මරු කැඳවු co amoxiclav ප්‍රතිජීවක එන්නත නිසා කරාපිටිය රෝහලේදී තවත් රෝගියකු මිය යාම සම්බන්ධයෙන් සෞඛ්‍ය අමාත්‍යංශය පරීක්ෂණයක් ආරම්භ කර තිබෙයි.
මෙම මරණය සම්බන්ධයෙන් සෞඛ්‍ය අමාත්‍යංශයේ සඳුදා පැවති සාකච්ජාවකින් පසු වෛද්‍ය සැපයුම් අංශයේ සවස්ථා දත්ත පද්ධතියේ පළ කළ දැන්වීමක සඳහන් වුයේ co amoxiclav 1.29 ( SR 00100905 ) හා inj co amoxiclav 600mg ( SR 00 1000904 ) දරණ ප්‍රතිජීවක එන්නත් භාවිතය අත්හිටවු බවයි.
තවද වෛද්‍ය සැපයුම් අංශයේ අධ්‍යක්ෂවරයා ජාතික ඖෂධ නියාමන අධිකාරියේ දැනුම් දීම මත නොවැම්බර් මස 22 වැනිදා සියලුම රෝහල් අධ්‍යක්ෂවරුන්ට ලිපියක් මගින් දැනුම් දි ඇත්තේ co amoxiclav inj 500 Mg ,600mg නිෂ්පාදන කාණ්ඩ රැසක් භාවිතයෙන් ඉවත් කරන ලෙසයි.
ඒ වෙනුවට අලුත් අමුද්‍රව්‍ය යොදාගෙන නිෂ්පාදන කටයුතු සිදු කරන මෙන් ජාතික ඖෂධ නියාමන අධිකාරිය එන්නත් නිෂ්පාදන කටයුතු සිදුකරන මෙන් ජාතික ඖෂධ නියාමන අධිකාරිය එන්නත් නිෂ්පාදන සමාගමට දැනුම් දී ඇත.
එම නව අමුද්‍රව්‍ය භාවිත කරමින් නිෂ්පාදනය කළ එන්නතකින් මෙම රෝගීයා මියගොස් ඇති බව සෞඛ්‍ය අමාත්‍යංශ ආරංචි මාර්ග සඳහන් කරයි.
මෙම එන්නත් නිෂ්පාදනය සිදුකරන්නේ හොරණ කිඳෙල්පිටිය ප්‍රදේශයේ පිහිටි කර්මාන්ත ශාලාවකිනි.
තංගල්ල, දුනුකේදෙණිය, නිකවැරටිය, රාගම, කරවනැල්ල, වතුපිටිවල, පේරාදෙණිය හා ගම්පහ යන රෝහල්වලදී මෙම එන්නත ලබාදීමෙන් පසු උග්‍ර ආසාත්මිකතා තත්ත්වයන්ට පත්වු රෝගින් 2023 වර්ෂයේ සිට වාර්තා වී තිබේ.
ජාතික ඖෂධ නියාමන අධිකාරියේ 2023 වර්ෂයේ සිටි සභාපතිවරයා වු මහාචාර්ය එස්. ඩී. ජයරත්න පැවසුවේ මෙම එන්නත හේතුවෙන් රෝගින් තිදෙනකු මරණයට පත්ව ඇති නිසා එන්නත පිළිබඳ වැඩිදුර පරීක්ෂණ සිදු කිරීමට ඔස්ට්‍රේලියාවේ රසායනාගාරයකට යොමු කරන බවයි. එහෙත් ජාතික ඖෂධ නියාමන අධිකාරියේ වත්මන් සභාපති විශේෂඥ වෛද්‍ය ආනන්ද විජේවික්‍රම මෙම වසරේ සැප්තම්බර් මස මාධ්‍යයට ප්‍රකාශ කළේ එම පරීක්ෂණයේදී තහවුරු වී ඇත්තේ එම එන්නතේ කිසිදු ගැටලුවක් නොමැති බවයි.
මේ අතර ඖෂධ ආසාත්මිකතා හේතුවෙන් වාර්තාවූ සිද්ධීන් ගැන සෙවීමට 2023 වර්ෂයේ පත්කළ කමිටුවේ සාමාජික ශ්‍රී ජයවර්ධනපුර විශ්ව විද්‍යාලයේ ආසාත්මිකතා හා ප්‍රතිසෛල ජීව විද්‍යා ඒකකයේ මහාචාර්ය චන්දිම ජීවන්දර පැවැසුවේ ඖෂධ භාවිතය හේතුවෙන් මාරාන්තික ආසාත්මිකතා ඇතිවි මියගිය රෝගින් භාවිතකර ඇති co amoxiclav එන්නත හා Bupivacaine Hydrochloride in Dxtrose එන්නත නිසා එම මරණ සිදුව ඇති බවයි.
තවද සෞඛ්‍ය අධ්‍යපන කාර්යංශයේ ඊයේ (04) පැවති මාධ්‍ය හමුවකදී ප්‍රතිජීවක ඖෂධ භාවිතය ගැන කතා කළ අතර එහිදි මෙම එන්නත පිළිබඳව මාධ්‍යවේදීන් විමසා සිටියත් සම්පත්දායකයන් වූ සෞඛ්‍ය අමාත්‍යංශයේ අධ්‍යක්ෂවරු එම ප්‍රශ්නය මග හැරීය.
