ගල්ඔයේ ඉවුරු බිඳීයාමේ අවදානම හේතුවෙන් ආරක්ෂිත ස්ථාන වෙත යොමුකළ අම්පාර, සේනානායකපුර, සාමපුර සහ සුදුවැල්ල යන ගම්මානවල පවුල් 44ක පුද්ගලයින් 135 දෙනෙකු තවදුරටත් එහි රඳවා තිබේ.
පවතින වැසි සහිත කාලගුණ තත්ත්වයත් සමග මේ වනවිට අම්පාර සේනානායක සමුද්‍රය වාන් මට්ටමට ආසන්න වෙමින් පවතින අතර, එසේ වුවහොත් එහි ජලය මුදාහැරෙන්නේ ගල්ඔයටයි.
අක්කර අඩි 770,000ක ධාරිතාවයකින් යුතු සේනානායක සමුද්‍රයේ උපරිම ජල ධාරිතාව අඩි 110 මට්ටමට පැමිණියහොත් එය වාන්දැමීම ආරම්භ වේ.
අද (15) උදෑසන වනවිට එහි ජලය අඩි 103ක උසකින් පැවති අතර, තවදුරටත් පවතින වැසි හමුවේ සේනානානයක සමුද්‍රයේ වාන්දොරටු දෙක සුළු වශයෙන් විවෘත කිරීමටයි පියවර ගෙන ඇත.
කෙසේ වෙතත්, තවදුරටත් පවතින වැසි හමුවේ සේනානානයක සමුද්‍රයේ වාන් දොරටු පූර්ණ වශයෙන් විවෘත කළහොත් හෝ වාන්දැමුවහොත් එහි ජලය මුදාහැරෙන ගල්ඔයේ ජල ධාරිතාව ඉහළ යනු ඇත.
ගල්ඔයේ ඉවුරු සුදුවැල්ල සහ කොටවෙහෙර යන ප්‍රදේශවලින් දැඩි ලෙස ඛාදනය වී තිබීම හේතුවෙන් ඉවුරු කැඩී යාමේ අවදානමක් මතුව තිබේ.
