ආණ්ඩුව අධ්‍යාපන පාසල් ප්‍රතිව්‍යුහගත ව්‍යාපෘතිය යටතේ සිසුන් අඩු ප්‍රාථමික පාසල් එක්දහස් පන්සිය පනස් හතක් (1557) වසා දැමීමට හඳුනාගෙන ඇතැයි ලංකා ගුරු සංගමය පවසයි.
එමගින් දැනට සියයට තුනක් (3%) පමණ තිබෙන ප්‍රාථමික අධ්‍යාපනය හැදෑරීම අත්හරින දරුවන්ගේ සංඛ්‍යාව තවදුරටත් ඉහළ යෑමේ අවදානමක පවතින බව ලංකා ගුරු සංගමයේ සභාපති ප්‍රියන්ත ප්‍රනාන්දු චෝදනා කරයි.
ආණ්ඩුවේ අධ්‍යාපන ප්‍රතිසංස්කරණ යටතේ මේ සඳහා ප්‍රමුඛස්ථානය ද ලබා දී ඇතැයි සභාපතිවරයා පෙන්වා දෙයි. මෙමගින් හුදෙකලා වූ තවත් පාසලකට ළඟාවිය හැකි ඉතා දුර දුෂ්කර ප්‍රදේශවල පාසල් දරුවන්ට විශාල අසාධාරණයක් වන බවද හෙතෙම කියයි. මෙමගින් පාසල් දරුවන් දස දහසක (10000) පමණ ග්‍රාමීය දුෂ්කර දරුවන් ප්‍රමාණයක් අසරණ වන බවද ප්‍රියන්ත ප්‍රනාන්දු කියා සිටියේය. මීට පෙර පැවැති ආණ්ඩු මෙම ප්‍රතිසංස්කරණ ගෙන ඒමට සූදානම් වෙද්දි එදා සටන් බිමේ සිටි වත්මන් ආණ්ඩුවේ පිරිස් මෙය සිදුකිරීම විමතියට කරුණක් බවද ඔහු කීවේය. අධ්‍යාපන පාසල් ප්‍රතිව්‍යුහගත ව්‍යාපෘතිය මගින් උසස් පෙළ හදාරන ළමුන් පහළොවට(15) අඩු උසස් පෙළ අංශද වසා වෙනත් පාසල්වලට ඒකාබද්ධ කිරීමේ වැඩපිළිවෙළක් ද මේ වන විට ආණ්ඩුව ක්‍රියාත්මක කිරීමට සූදානම් බව ඒ මහතා කීය. මෙමගින් ද සාමාන්‍ය පෙළින් තේරී පත්වූ ළමුන් උසස්පෙළ කිරීමේ අවදානමක් ද ගොඩනැගෙන බව ප්‍රියන්ත ප්‍රනාන්දු මහතා පෙන්වා දුන්නේය. මේ සඳහා කළ යුත්තේ අදාළ පාසල්වලට විෂයට අදාළ ගුරුවරු සපයා පහසුකම් සැලසීම මිස එම අංශ වසා දැමීම නොවන බවද ප්‍රියන්ත ප්‍රනාන්දු මහතා පැවැසීය.
