චීනයේ සංචාරයක් අතරතුරදී අත්අඩංගුවට ගැනුණු ඔස්ට්‍රේලියානු ජාතිකයෙකුට චීන අධිකරණයක් විසින් අත්හිටවූ මරණ දණ්ඩනය නියම කර තිබෙනවා.
ඔත්තු බැලූ බවට චෝදනා කරමින් චීන බලධාරීන් විසින් ආචාර්ය යැන්ග් හෙන්ග්ජුන් මීට වසර 5කට පෙර අත්අඩංගුවට ගත් අතර ඔහු එම චෝදනා ප්‍රතික්ෂේප කළේය.
ග්‍රන්ථ කර්තෘවරයෙක්, ආචාර්යවරයෙක් මෙන්ම චීන කටයුතු සම්බන්ධ ප්‍රවීණයෙක් වන හෙන්ග්ජුන් ට ලබාදී ඇති දඬුවම වසර දෙකකට පසුව ජීවිතාන්තය දක්වා වූ සිරදඬුවමක් බවට සංශෝධනය කෙරෙතැයි අනුමාන කෙරේ.
ඔහු ට එරෙහිව එල්ලකර ඇති චෝදනා පත්‍රය මෙතෙක් ප්‍රසිද්ධ කර නොමැත.
චීන අධිකරණ තීන්දුව පිළිකුලෙන් බැහැර කරන බව ඔස්ට්‍රේලියානු රජය පැවසීය.
