අඹතලේ චන්ද්‍රිකා කුමාරතුංග මාවත මාර්ගයේ ඇණ යොදා ලෑලි මත සෑදූ බාධකයක් යොදා ගනිමින් එම මාර්ගයේ රාත්‍රී කාලයේ ගමන් ගන්නා රථවාහන කොල්ලකෑමට කිසියම් සංවිධානාත්මක කණ්ඩායමක් කටයුතු කර ඇත.
ඒ කලක පටන් මෙම උපක්‍රමය යොදා ගනිමින් එම මාර්ගයේ ගමන් ගන්නා රථවාහන කොල්ලකෑමට මෙම පිරිස උත්සාහ ගන්නා බවට ප්‍රදේශවාසීන් පොලිසිය දැනුවත් කර ඇතත් මේ දක්වා ඒ පිළිබඳව අවධානය යොමු කර නැතැයි ද ඔවුහු පෙන්වා දෙති.
මෙම මාර්ගයේ අවට විශාල ජනතාවක් පදිංචිව සිටින බැවින් ඔවුන්ගේ පුද්ගලික රථවාහන රාත්‍රී කාලයේදී අදාළ බාධකය යොදා නවතාලමින් කොල්ලකෑමේ නිරතවීම කොල්ලකරුවන්ගේ අරමුණ වී ඇතැයි ද ප්‍රදේශවාසීහු පවසති.
ප්‍රදේශයේ මත්ද්‍රව්‍යයන්ට යොමුව ඇති පුද්ගලයන් මෙම ක්‍රියාවන් පිටුපස සිටිනු ඇති බවට සැක පළ කරන ප්‍රදේශවාසීන් මේ පිළිබඳව අවධානය යොමු කරන ලෙස පොලිසිය ඇතුළු බලධාරීන්ගෙන් ඉල්ලා සිටිති.
