ලෝක ගෘහස්ත ක්‍රිකට් සමිමේලනයේ මෙහෙයවීමෙන් සිලෝන් ගෘහස්ත ක්‍රිකට් සම්මේලනය සංවිධාන කරනු ලබන ගෘහස්ත ක්‍රිකට් ලෝක කුසලාන තරගාවලිය එළැඹෙන සැප්තැම්බර් මස තලවතුගොඩ ඔස්ටේෂියා ගෘහස්ත ක්‍රීඩාංගණ සංකීර්ණයේ පැවැත්වීමට නියමිත අතර ඒ පිළිබඳ දැනුවත් කිරීමේ මාධ්‍ය හමුවක් පෙරේදා (26 වැනිදා) කොළඹදී පැවැත්විණි.
සැප්තැම්බර් මස 27 වැනිදා සිට ඔකතෝබර් 5 වැනිදා දක්වා පැවැත්වෙන මෙම තරගාවලිය සඳහා ක්‍රීඩක ක්‍රීඩිකාවන්, නිලධාරීන් සහ දිරිගන්වන්නන් දහසකට අධික සංඛ්‍යාවක් දිවයිනට පැමිණිමට නියමිත බැව් මෙහිදී පැවසුණි.
රටවල් නවයක සහභාගිත්වයකින් පැවැත්වෙන මෙම 12 වැනි ගෘහස්ත ලෝක කුසලාන සත්කාරකත්වය වසර 21කට පසු ශ්‍රී ලංකාවට ලැබී ඇත්තේ මීට මාස 5කට පෙර ශ්‍රී ලංකාවෙහිදී පැවැත්වුණු, ‘මාස්ටර්ස්’ ලෝක ගෘහස්ත ක්‍රිකට් තරගාවලියේ ලද සාර්ථකත්වය හේතුවෙනි. තරගාවලියට සියලු ගෘහස්ත ලෝක කුසලානවල ශූරතාව දිනූ ඔස්ට්‍රේලියාව සමගින් නවසීලන්තය, දකුණු අප්‍රිකාව, ඉන්දියාව, එංගලන්තය, එක්සත් අරාබි එමීර් රාජ්‍යය, සිගප්පූරුව, ඇමරිකාව සහ සත්කාරක ශ්‍රී ලංකාව යන රටවල් සහභාගී වේ. මෙම තරගාවලියේ පිරිමි විවෘත, කාන්තා විවෘත, අවුරුදු 22ට අඩු පිරිමි සහ අවුරුදු 22ට අඩු කාන්තා යන කාණ්ඩ වලින් පැවැත්වෙනු ඇත.
ගෘහස්ත ක්‍රිකට් ක්‍රීඩාවේ ප්‍රබලයින් වන ඔස්ට්‍රේලියාව, නවසීලන්තය සහ දකුණු අප්‍රිකාව යන රටවලින් කාණ්ඩ හතරටම කණ්ඩායම් ඉදිරිපත් වීමට නියමිත ය. එසේම මෙම තරගාවලිය දේශීය සංචාරක ව්‍යාපාරයේ ප්‍රවර්ධනය උදෙසා ද හේතුවනු ඇතැයි සංවිධායකයෝ පවසති.
ලෝක ගෘහස්ථ ක්‍රිකට් තරගාවලියක් මුල් වරට පැවැත්වූයේ 1995දී එංගලන්තයේ බර්මින්හැම් හීදී වන අතර ඔස්ට්‍රේලියාව, නවසීලන්තය, දකුණු අප්‍රිකාව සහ ඩුබායිහිදී ද මෙම ලෝක කුසලාන තරගාවලි පවත්වා තිබේ. ශ්‍රීලංකාවේ අවසන් වරට 2003දී තරගාවලියක් පවත්වා ඇත.
අදාළ මාධ්‍ය හමුවේදී අදහස් දැක්වූ සිලෝන් ගෘහස්ථ ක්‍රිකට් සම්මේලනයේ මෙහෙයුම් ප්‍රධානී හිරාන් ඩි මෙල්, මෙම තරගාවලිය ශ්‍රී ලාංකේය ගෘහස්ත ක්‍රිකට් ක්‍රීඩාව ව්‍යාප්ත කිරීම සඳහා වන මහඟු අවස්ථාවක් බව ප්‍රකාශ කළේ ය. තවදුරටත් අදහස් දැක්වූ ඔහු, ” ශ්‍රී ලංකාවේ මේ වෙනකොට ගෘහස්ථ ක්‍රිකට් ක්‍රීඩාව ප්‍රචලිතව තියෙන්නේ කොළඹ ආශ්‍රිතව පමණයි. අපි බලාපොරොත්තු වෙනවා මේක ශ්‍රී ලංකාව පුරා ප්‍රචලිත කරන්න. මොකද ගෘහස්ථ ක්‍රිකට් ක්‍රීඩාව කියලා කියන්නේ, ක්‍රිකට් ක්‍රීඩකයකුගේ පන්දු යැවීම පන්දු රැකීම සහ පන්දුවට පහරදීම යන තුන් ඉරියව්වම වැදගත් වන තරග රටාවක්. එමගින් ක්‍රිකට් ක්‍රීඩකයකුට තමන්ගේ දක්ෂතාවන් වැඩි දියුණු කර ගැනීමේ ඉහළ අවස්ථාවක් ලබා ගන්නට පුළුවන්” යනුවෙන් පැවැසීය.
තරගාවලිය ක්‍රීඩා කරනු ලබන ශ්‍රී ලංකා සංචිතය පිළිබඳව මාධ්‍ය කළ විමසීමකදී අදහස් දැක්වූ පිරිමි ක්‍රිකට් කණ්ඩායමේ පුහුණුකරු අසේල පතිරණ, තවමත් නිශ්චිතව සංචිතයක් තෝරාගෙන නොමැති බවත්, මේ දිනවල සංචිතයේ තෝරා ගැනීම් සිදුකරමින්, හැකි ඉක්මනින් සංචිතය මාධ්‍ය වෙත ප්‍රකාශ කරන බවත් පැවසීය.
මෙම අවස්ථාවට ඔවුන් දෙදෙනාට අමතරව, යූ ප්‍රෝ ආයතනයේ කළමනාකරණ අධ්‍යක්ෂ මනීෂ් ක්‍රිෂෝර්, තරගාවලිය සම්බන්ධීකාරක ප්‍රියන්ත වික්‍රමරත්න, කාන්තා කණ්ඩායමේ පුහුණුකාරිණී මනෝරි කොඩිතුවක්කු සහ සිලෝන් ගෘහස්ථ ක්‍රිකට් සම්මේලනයේ මාධ්‍ය අධ්‍යක්ෂ රවීන් ද සිල්වා ඇතුළු පිරිසක් සහභාගී වූහ.
