එක්සත් ජනපදයේ බැල්ටිමෝර් නගරයේ ෆ්‍රැන්සිස් ස්කොට් කී පාලමේ බහාලුම් නෞකාවක් කඩා වැදීමෙන් පසු ගෝලීය සැපයුම් දාමයට සැලකිය යුතු බාධාවක් ඇති වේ යැයි බියක් මතු වී තිබෙනවා.
ඩාලි නම් වූ නෞකාව ඊයේ අලුයම ෆ්‍රැන්සිස් ස්කොට් කී පාලමේ ආධාරක තීරුවක ගැටීමෙන් එය කඩා වැටුණා.
යාත්‍රාව බැල්ටිමෝර් වරායේ සිට ශ්‍රී ලංකාව දක්වා දින 27 ක ගමනක් ආරම්භ කර වරායෙන් පිටවීමෙන් පසු සම්පූර්ණයෙන්ම බලය අහිමි වී නගරයේ ප්‍රකට ෆ්‍රැන්සිස් ස්කොට් කී පාලම දෙසට ඇදෙමින් තිබුණු බව සඳහන්.
මෝටර් රථ අපනයනය සඳහා එක්සත් ජනපදයේ කාර්යබහුලම වරාය වන සහ සමස්තයක් වශයෙන් නවවන කාර්යබහුලම වරාය වන බැල්ටිමෝර් වරායට ඇතුළුවීම ඒ අනුව දින නියමක් නොමැතිව නතර කර ඇති බවයි වාර්තා වන්නේ.
පාලම අනතුරට පත්වන විට එහි කටයුතු කරමින් සිටි පුද්ගලයන් හය දෙනෙකු අතුරුදන් වී ඇති බවට අනුමාන කෙරෙන අතර එක්සත් ජනපද වෙරළාරක්ෂක බළකාය සිය සෝදිසි කිරීම් සහ මුදාගැනීමේ මෙහෙයුම් අත්හිටුවා ඇති අතර ප්‍රතිසාධන මෙහෙයුමක් ආරම්භ කර තිබෙනවා.
ප්‍රවාහන ආරක්ෂණ විශේෂඥයින් කණ්ඩායමක් අනතුරට ලක් වූ නෞකාවට ගොඩවී එහි දත්ත පටිගත කිරීමේ යන්ත්‍රය නැවත ලබා ගැනීමට බලාපොරොත්තු වන අතර, අනතුරට හේතුව විමර්ශනය වෙත දැන් අවධානය යොමු වී තිබෙනවා.
මේ අනුව පසුගිය වසරේ විදේශීය භාණ්ඩ ටොන් මිලියන 47 කට වඩා සිදුකළ වරාය හරහා නාවික ගමනාගමනය “නැවත දැනුම් දෙන තුරු” අත්හිටුවන බවයි නිලධාරීන් පවසා ඇත්තේ.
ජාත්‍යන්තර වෙළඳාමට සම්බන්ධ එක්සත් රාජධානියේ ව්‍යාපාර නියෝජනය කරන අපනයන සහ ජාත්‍යන්තර වෙළඳ ආයතනයේ අධ්‍යක්ෂ ජනරාල් මාර්කෝ ෆෝජියෝන් බීබීසී වෙත අදහස් දක්වමින් පැවසුවේ අත්හිටුවීම “ගෝලීය සැපයුම් දාමයට සැලකිය යුතු බලපෑමක් ඇති කරන” බවයි.
පසුගිය වසර තුළ මෝටර් රථ සහ වාහන 750,000 කට අධික ප්‍රමාණයක් බැල්ටිමෝර් හරහා සංක්‍රමණය වී ඇති බවත් ඔහු වැඩිදුරටත් පවසනවා.
එම මෝටර් රථ සහ වාහන අතරට එක්සත් රාජධානියේ, එක්සත් ජනපද සහ යුරෝපා සංගම් වෙළඳ නාම වන ජෙනරල් මෝටර්ස් සහ ෆෝඩ්, ජගුවාර්, ලෑන්ඩ් රෝවර්, නිසාන්, ෆියට් සහ අවුඩි දක්වා ප්‍රධාන වෙළඳ නාම සහිතයි.
