රුසියානු – යුක්රේන යුද්ධය අවසන් කර රුසියාවෙන් යුක්රේනය ආරක්ෂා කිරීම සඳහා කොටස් හතරකින් යුත් සැලසුමක් බ්‍රිතාන්‍ය අගමැති කියර් ස්ටාර්ම පසුගියදා නිවේදනය කළේය.
යුක්රේනයට ලබාදෙන සහාය වැඩි කිරීම සඳහා සන්ධානයක් පිහිටුවීමේ උත්සාහයන් එක්සත් රාජධානිය, ප්‍රංශය සහ අනෙකුත් රටවල් වේගවත් කරනු ඇතැයි බ්‍රිතාන්‍ය අගමැති ස්ටාර්ම ප්‍රකාශ කළේය.එම රටවල් ඇමෙරිකාවද සන්ධානයට එකතු කර ගැනීමට උත්සාහ දරනු ඇතැයි බ්‍රිතාන්‍ය අගමැතිවරයා පැවැසුවේය.
සන්ධානගතවීම සඳහා පැවැත්වූ සමුළුවට රටවල් 18 සහභාගී වී සිටි අතර ඉන් වැඩිම රටවල් ප්‍රමාණය යුරෝපයට අයත් විය. එම සමුළුව සඳහා යුක්රේන ජනාධිපති ව්ලොදිමීර් සෙලෙන්ස්කිද සහභාගී වූවේය. ” අපි අද ඉන්නේ ඉතිහාසයේ සන්ධිස්ථානායක” සමුළුවට සහභාගී වෙමින් බ්‍රිතාන්‍ය අගමැති කියර් ස්ටාර්ම පැවැසුවේය.
යුක්රේනයට සහාය වීම සඳහා යුරෝපයේ දීර්ඝ කාලයකින් නොදුටු එකමුතුකමක් දැක ගැනීමට හැකියාව ලැබුණු අතර යුක්රේන ජනාධිපති ව්ලොදිමීර් සෙලෙන්ස්කි කියා සිටියේ යුක්රේනයට “ශක්තිමත් සහයෝගයක්” තිබෙන බව දැනුනු බවයි. යුක්රේන ජනාධිපතිවරයා සහ ඇමෙරිකානු ජනාධිපතිවරයා අතර ධවල මන්දිරයේදී සිදුවූ උණුසුම් වචන හුවමාරුවෙන් දින දෙකකට පසුව මෙම සමුළුව පැවැත්විණි.
ඇමෙරිකාවේ සහයෝගීතාව ලබාගැනීම සඳහා පදනමක් සොයා ගැනීමට යුරෝපයේ සියලුම රටවල් එක්ව කටයුතු කරන බව බ්‍රිතාන්‍ය අග්‍රාමාත්‍ය ස්ටාර්මර් පැවැසුවේය.
