මෙරට සහල් අර්බුදය විසඳීම සඳහා බව පවසමින් ඉන්දියාවෙන් ආනයනය කරන ලද මිනිස් පාරිභෝජනයට නුසුදුසු කල් ඉකුත්වූ සහල් මෙට්‍රික් ටොන් 75 ක සහල් තොගය වහාම ප්‍රතිඅපනයනය කරන ලෙස රේගුව ආනයනකරුට දැනුම්දී ඇත.
මෙරට වෙළෙඳපොළේ සහල් හිඟයක් උද්ගතවීමත්, ප්‍රමාණවත් පරිදි සහල් තොග වෙළෙඳ පොළට නිකුත් කිරීමට මහා පරිමාණ සහල් ව්‍යාපාරිකයන් කටයුතු නොකිරීමත් නිසා කඩිනමින් සහල් ආනයනය කිරීම සඳහා සහල් සඳහා පැවැති ආනයන සීමා ඉවත් කිරීමට රජය ඉකුත් 04 වැනිදා කටයුතු කළේය.
ඒ අනුව, ඕනෑම ආනයනකරුවෙකුට මෙමස 20 වැනිදා දක්වා සහල් ආනයනය කිරීමට රජය අවසරය ලබාදී තිබේ. ඒ අනුව, මෙරටට ආනයනය කරන ලද මිනිස් පාරිභෝජනයට නුසුදුසු, ගුල්ලන් සහිත මෙට්‍රික් ටොන් 50 ක සහල් තොගයක් සහිත බහලුම් දෙකක් සහ කල් ඉකුත් වූ දිනය වෙනුවට ව්‍යාජ දින යොදා තිබූ මිනිස් පරිභෝජනයට නුසුදුසු මෙට්‍රික් ටොන් 25 ක සහල් තොගයක් සහිත බහලුමක් වහාම ප්‍රතිඅපනයනය කිරීමට රේගුව නියෝග කර තිබෙයි.
ආනයනික සහල් තොග රේගුව, ආහාර පරීක්ෂක සහ ජාතික ශාක නිරෝධායන සේවයෙන් පරීක්ෂාවට ලක් කර ඇති අතර මෙම සහල් තොග මනුෂ්‍ය පරිභෝජනයට සුදුසුද යන්න අවසන් නිගමනය කිරීමේ බලතල ඇත්තේ ආහාර පරීක්ෂකවරයාට සහ ජාතික ශාක නිරෝධායන සේවයේ නිලධාරියාටය.
ඒ අනුව එම නිලධාරීන් විසින් කරන ලද පරීක්ෂාවේදී අනාව රණයවී ඇත්තේ බහලුම් දෙකක සහල් මිනිස් පරිභෝජනයට නුසුදුසු බවය. එම බහලුම් දෙක වහාම ප්‍රතිඅපනයනය කරන ලෙස රේගුවෙන් අදාළ අපනයනකරුට දැනුම්දී තිබෙන අතර, එලෙස නොකළහොත් අදාළ සහල් තොගය රාජ සන්තක කිරීමෙන් පසු විනාශ කිරීමට කටයුතු කරන බව රේගුව පවසා ඇත.
