අධික වර්ෂාව නිසා හානි සිදුවූ ගොවීන්ට ඒ භෝගවලට වන්දි ලබාදීමේ වැඩපිළිවෙලක් කෙරෙහි රජයේ අවධානය යොමු වී ඇතැයි කෘෂිකර්ම නියෝජ්‍ය අමාත්‍ය නාමල් කරුණාරත්න මහතා පවසා ඇත.
එමෙන්ම කෘෂිකර්ම දෙපාර්තමේන්තුව සතුව පවතින බිත්තර වී තොගයන් ඉතා කුඩා ප්‍රමාණයක් බව පැවසූ නියෝජ්‍ය ඇමතිවරයා එම නිසා බිත්තර වී වගා කරන ගොවීන්ගෙන් එම වී මිලදී ගැනීමට බලාපොරොත්තු වන බවද ප්‍රකාශ කර ඇත.
වන්දි ලබාදීමේ ක්‍රියාවලියේ දී වී, බඩඉරිඟු, ලොකු ලූනු, අර්තාපල්, සෝයා, ගම්මිරිස් යන භෝගයන්ට පමණක් වන්දි හිමිවන ක්‍රමවේදය වෙනස්කර මෙවර වර්ෂාවෙන් හානි වූ අනිකුත් භෝග වගා කළ ගොවීන්ටත් යම් වන්දියක් ලබා දිය යුතු යන ස්ථාවරයේ තමන් සිටින බව පැවසූ නියෝජ්‍ය අමාත්‍යවරයා භාණ්ඩාගාරයේ තිබෙන මුදල් තත්ත්වය සැලකිල්ලට ගෙන ඒ සඳහා ඉල්ලිමක් කැබිනට් මණ්ඩලයට ඉදිරිපත් කිරීමට කටයුතු කිරීමට නියමිත බව ද එහිදී පවසා තිබෙයි.
